طاجن البامية باللحمة الضاني

حطّي باقي صلصلة الطماطم على الطاجن






النهارده هنعمل طاجن البامية باللحمة الضاني اللي كلنا بنحبه، لكن
بطريقة جديدة جرّبيها معانا وابعتي لنا رأيك فيها، وماتنسيش تبعتي لنا كل
الوصفات اللي عايزة تعرفيها..

طاجن البامية باللحمة الضاني
المقادير:
كيلو بامية
كيلو لحمة ضاني
2 ثمرة بصل مفروم
2 ملعقة كزبرة جافة
3 فصوص ثوم مفروم
ملعقة صغيرة بهارات
3 كوب عصير طماطم
4 ملعقة كزبرة خضراء
قرن فلفل حامي مفروم

الطريقة:
1-
تبّلي اللحمة بالملح والفلفل، وشوّحيها مع شوية زيت زيتون ونصف كمية
البصل، وبعد كده ضيفي عليها شوية من صلصة الطماطم، وسيبيها على النار علشان
تتسبّك.

2- شوّحي البامية في حلة مع شوية زيت زيتون وباقي كمية
البصل وفص ثوم واحد وملعقة كزبرة خضراء والفلفل الحامي والبهارات، وقلّبيهم
كلهم مع بعض على النار.

3- حطّي اللحمة على البامية وقلّبيهم كويس، وحطّيهم في الطاجن.

4- شوّحي باقي الثوم والكزبرة الخضراء والكزبرة الناشفة، وشوّحيهم كلهم في شوية زيت زيتون في طاسة على النار.

5- حطّي باقي صلصلة الطماطم على الخلطة دي، وسيبيها على النار شوية.

6- حطّي الخلطة دي على طاجن البامية وعليها شرائح طماطم، ودخّليها الفرن لمدة 20 دقيقة.. وبالهنا والشفا.