وقفت الدنيا انتباه
ساعة ما الشعب قام
والزمان كان هو حاجب
... والظالم كان هو اللي غايب
والنيابة من شبابنا
ملايين وثارت ع النظام
طالبت براس الظلم يرحل
وقدمت مليون اتهام
اغتصاب حلم الغلابة
واختصاره ف النظام
وسرقة النوم من عيونهم
واغتصابهم ف الضلام
والأرض اللي سمموها
وباعو اللي اتبقي منها
غفلة منا ف الزحام
وقطعوا لسان الحق عمدا
وانخرس حتي الكلام
واستباحو كل حرمة
عيني عينك مقلوش حرام
باختصار سرقو الوطن....
بإصرار ف غفلة من الزمن
والنتيجة كانت خراب
واتحكمو فينا الكلاب!
محمكة!
الدفاع!
ديول وفلول
وحرب مغول
تتار بتحرق حلمنا
بتنهش لحمنا
وبتدق للحرب الطبول
حصار لكل ثاير
بيلففونا حوالين الحقيقة
كعب داير
لجل ما كل اللصوص
تدب ف عروقهم حرارة
لو حتي من تاني يسقونا المرارة
المهم............
يطلعو من كل جرايمهمم براءة
محكمة !
الحكم من بعد المداولة
والغرفة كانت نيل ودولة
والحكم يمكن بعد 1000 جولة
محكمة!
بعد شد وخد وهات
والمعارضة وتأجيلات
ونقض حكم واستئنافات
محكمة!
والشعب قاطع النفس
والسجين مش جوه القفص
القاضي ف زهو وكبرياء.....
كأنه انخرس!!!!